* Hikayat lajang *

Assalaalaikom ulon kheun sigoe,
ban bandum geutanyoe hudep seujahtra

ulon neuk kisah lam hudep tanyoe
beuneutem deungoe wahe cedara

meunyoe na salah bak uloe tuleh
neu kritik beuhabeh solusi beuna

ulon sadari ban meurunoe teumuleh
bah pi hana gleh lage gob yang ka ka


ulon cuba tuleh keu galak-galak
bah pi tan lagak yang peunteng kana

jinoe lon peugah keu aneuk lajang
keudeh keunoe han meugisa-gisa

beungoh kadang di jak di wo ka malam
jak jalan-jalan sabe-sabe muda

cicem meurak bule jih keumang
sajan di teureubang ngon cicem pala

udep meulajang leupah that senang
dak tan peng sajan hana jeut keudawa

keupeu meukawen udep tan teunang
yang na cit mumang sabe teurasa

uroe pi hek malam pi hek
tapeutimang bek sundek di mak si dara

meunyoe meulajang han sapeu pike
asai na HP habeh peukara

SMS sagoe nyoe telpon sagoe jeh
beuthat peng habeh yang peunteng bahagia

peulom jinoe le SMS grateh
han abeh-abeh hana ta tuho ba

meunyoe na SMS di balah bagah
mangat sabe pah peugah cerita

kadang teungoh duk kadang teungoh eh
haba han abeh troh malam jula

wate takalon sang ka pungoe
teu khem-khem keudro bak peugah haba

jaroe siblah bak punyung siblah ho laen
hana ek ta khem wate tanging na

laen saboh teuk peukateun lajang
mata meutrawang ngon dunia maya

di jak bak warnet kon di mita bahan
lale ngon atanyan peulale mata

di buka facebook di cari teman
tuleh catatan unggah fotonya

di bloe HP beumeuceh nexian
jeut mangat facebokan ngon kaom dum na

wate hana peng jak lake bak yah
peugadoh susah hate meurana

udep meulajang na cit tan mangat
yoh malam jumat han ta teupeu wa

yoh di toeh ujeun di troen dari langet
hate meu met-met gundah gulana

angen pi di pot sijuk meuguncang
hate meulanglang jaroe lam lungkik pa

bek ma lon peugah nyoe singoh neujak hoi wareh
jak lamar siputeh aneuk toke sira

neuk meukawen neukira beu abeh
dari yum bantai eh sampoe yum saka

yum campli cut dengon campli kleng
boh kalang kaleng tuk buleun puasa

meunyoe yum meuh kana bak koran
tinggai jak bak pasai meunyoe peng kana

neukira jeulame dengon peuneuwo
bek sagai tuwoe minyeuk isabella

jeulame kana tinggai tapileh
adek puteh gleh ka di preh gata

bek salah pileh wahe kaom lon
singoh tan untong yang na keucewa

yang got budi kaya ngon tari 

yang peunteng islami leubeh utama

dara Aceh yang mirah bibi
dara bali yang sayu mata

bek that tagalak yang lagak bodi
meunyoe tan suci hate lam dada

bek that taharok yang leupah tari
cinta di bagi hana setia

neupileh judo yang mantong asli
yang mantong meuri iman lam dada

seubab jameun nyoe le that kendali
kureung islami dum aneuk muda

peupatah jameun kaleuh geusudi
yang lagak bodi hanjeut ta peucaya

judo tamita iman islami
mangat seurasi hudep lam rumoh tangga

karna judo kon tuk dua hari
sehidup semati sampoe an tuha

ladum takalon wate tapandang
cantek koen wayang mameh lagoina

rupa jih rumeh bodi jih timang
sayang that gob nyan kaleuh gob cuca

ta eu di lua rupa jih hayeu
oh wate tateupeu suci jih hana

pajan ta teupeu hai cut po linto
malam dara baroe hana le rasa

di kheun dek gob na saket mangat
tapi yang ta mat lage lam paya

padum na seudeh di cut po linto
nyan dara baro hana le dara

hai po tuboh neu pike-pike
hanco hate saket teurasa

ot nyoe keu dile yang jeut lon tuleh
meuah beuhabeh nyoe na salah kata

dari yoh sinja lon pupon karang
sampoe teungoh malam cuma et nyoe na

mata kateugantuk kajula malam
selamat malam singoh keureuja

kaleuh lon tuleh puduk bak catatan
Waalaikom salam para pembaca

Banda Aceh
04, agust, 2010

Rajitusyah